Kālacakrāvatāra
Tibetan edition

Click here for Sanskrit edition


rgya gar skad du / kā la tsa krā ba tā ra nā ma / bod skad du / dus kyi 'khor lo la 'jug pa zhes bya ba / 'phags pa 'jam dpal gzhon nur gyur pa la phyag 'tshal lo //

shes rab snying rje gnyis med bde ba mtha' med pa //
sna tshogs rnam pa 'dzin la rtog pa med pa'i gzugs //
gzugs med gzugs la sogs pa'i rang bzhin can gyi sku //
rgyal ba skye bo kun gyi gnyug ma la phyag 'tshal //

gang zhig nam mkha'i dpal rnams ma lus ster byed cing // 'byor pa dang ni rgud pa yang ni ston mdzad pa // de bzhin gshegs pa rnams kyi nang ltar gsal byed pa'i // gza' skar de dag thog mar mun las rgyal gyur cig //

'dir gang gi phyir ser snas nye bar nyams pa'i mu stegs pa rnams kyi rtsis kyi grub pa'i mtha' sbas te byed pa nyung ngu'i spros pa mang po byas kyang mi shes pa'i phyir da ni bstan par bya ste /

[1] dang por gsum dang drug cus lhag pa'i bzhi brgya phri bar bya'o // dkar po'i tshes gcig la sogs pa'i nag pa'i zla ba la sogs pa lor gang gi gyur pa de'i tshe de rnams de la bsre bar bya'o // de la gnyis dang brgyad cu dang brgya phri ba ni dag pa'i lo'i brtan par 'gyur ro //

[2] de la nyi mas bsgyur bas zla ba'i tshogs so // dkar po'i tshes gcig la sogs pa nas gnam stong gi mthar thug pa nag pa la sogs pa'i zla bar gyur pa de la bsres te / gnas gnyis su bzhag la 'og na gnas pa bzhis bsgyur nas nam mkha' me dang zla bas bgo zhing bgos pa'i lhag ma dbyi'o // thob pa rnams steng du bcug par gyur pas steng ma dag pa'i zla ba'i phung por 'gyur ro // gang gi tshe dbyar zla 'bring po gnyis byung ba de'i tshe zla ba bcu gsum gyis lor bya'o // zla ba gnyis po gcig tu bgrang zhing nag pa'i zla bar yang gzhug par mi bya'o //

[3] de nas dag pa'i zla ba'i phung po de gnas gsum du byas te / dbus ma'i phung po lag pa dang rtse mo can gyis bsgyur ba la 'og na gnas pa la drug gis thob pas sbyang par bya'o // gal te bgos pa'i lhag ma yod na de'i tshe yang drug gi thob pa'i chas sbyang par bya'o // 'dir 'og na gnas pa la sum cus bsre zhing drug cus bgos pas thob pa steng mar gnyis bsres bar gzhug go // bgos pa'i lhag ma dbyu gu'i phung por 'gyur ro // steng ma bdun gyis bgos pa'i lhag ma gza'i phung por 'gyur ro // thob pa ni ci yang ma yin no //

[4] slar yang zla ba dag pa'i phung por gnyis dang bcus lhag pa'i brgya bsres la gnas gnyis su byas te / 'og na gnas pa la dus dang / nyi mas bgos pa'i lhag ma ril po'i cha shas su 'gyur ro // bgos pas thob pa la lnga bsres la steng ma gnyis kyis bsgyur bar sbyin no // de nas steng ma nyi shu rtsa brgyad kyis bgos la bgos pa'i lhag ma rkang pa'i ril por 'gyur ro //

'dir gza'i phung po dang / dbyu gu dang / rkang pa'i ril po dang / ril po'i cha shas rnams rim par 'og ma 'og mar dbri bar bya'o //

[5] yang dag pa'i zla ba gnas gsum gyi dbus mar gnas pa dbang phyug gis bsgyur zhing 'og ma la sum cu rtsa dgus bgos pas thob par gnyis bsres pas phri ba la / dbyu gu drug cus bgos shing bgos pa'i lhag ma rgyu skar gyi dbyu gur shes par bya'o // thob pa ni steng ma gnyis kyis bsgyur ba la sbyin par bya'o // de nas steng ma nyi shu rtsa bdun gyis bgos pa'i lhag ma skar ma'i phung por shes par bya'o // 'dir rgyu skar gyi phung po'i 'og tu rgyu skar gyi dbyu gu'i phung po dbri bar bya'o // gang gi tshe lo'i phung por lo dang / dag pa'i zla ba'i phung por yang zla ba ma bcug na / de'i tshe zla ba so so la gza' dang / dbyu gu dang / rkang pa'i ril po dang / ril po'i cha shas rnams su go rims bzhin du gcig dang sum cu rtsa gnyis dang gnyis dang gcig rnams sbyin no // rgyu skar dang de'i dbyu gur gnyis dang drag po dag sbyin no // lo la sogs pa bcug na ni gza'i phung po la sogs pa gzhan kho na bya'o //

nyi ma so so'i gza'i phyir dang / tshes kyi longs spyod kyi don du da ltar ba'i zla ba'i dkar po'i tshes gcig la sogs pa 'das pa dang / da ltar ba'i tshes rnams grangs ji lta bar bsnan pa dang dbri ba dang / slar yang bsnan pa ni gza' dang dbyu gu dang rkang pa rnams su'o //

[6] ril po la bcu bzhis bgos pas thob pa gnyis sam bzhi 'am ma thob kyang mnyam pa'i phung por shes par bya'o // gcig gam gsum thob pa ni mi mnyam pa'o // 'di las lhag pa mi thob ste / gang gi tshe nyi shu rtsa bdun pas lhag pa'i ril po mi 'gyur zhing // de yang tshes sum cu dang bcas na lnga bcu rtsa bdun las lhag par mi 'gyur ro // mnyam na zla ba'i rkang pa rnams sbyin par bya zhing mi mnyam na dbri bar bya'o // bgos pa'i lhag ma ni / stong par stong pa rnam dag bcu gsum ri bong can la rkang pa lnga sta mig dang nyi mar phyogs // bcu gcig me la tshes zhes bya ba bcu dang chu gter rkang pa nyi shur gcig gis ma tshang ba / lnga dang bu gar nyi shu gnyis te dus dang nor la rgyal ba bdun par nyi shu rtsa lnga'o // der ni nyi ma'i rab tu dbye bas nyin byed bsnan dang 'bri ba byas pas rab tu gsal bar 'gyur / rnam dag ces pa ni cung zad sbyin pa'am dbri ba med pa'o // der ni zhes bya ba dbyu gu'i phung por ro // nyi ma'i rab tu dbye bas ni nyi ma'i rkang par gyur pa rnams te / nyi ma'i bu lon ni de'i yang bu lon no // nyi ma'i nor ni de'i yang nor ro zhes bya ba ni nyi ma'i rab tu dbye ba'o //

'di skad gsungs pa yin te // 'chad par 'gyur pa'i tshul gyis 'byung ba la sogs pas bgos pas thob pa bsres pa'am / dor ba'i nyi ma rgyu ba'i rkang pa rnams bsdams pa ji ltar yod par gyur pa de snyed ni ra bi ka zhes bya'o // gal te nyi ma'i longs spyod du snon pa ni de'i tshe gza'i chu tshod la yang bsnan no // yang na nyi ma'i longs spyod la 'brid na yang dbri bar bya'o //

zla ba'i rkang pa rnams kyang 'byung dang 'byung ba mda' dang rig byed me lag ri bong can rnams mdun gyi cha dang rgyab tu yang // mdun gyi char ni steng nas go rims kyis te / dbus su thad kar re khā gzhag pa'i rgyab tu 'ong nas ri bong can la sogs pa go rims bzlog nas bcu bzhi po rnams bri bar bya'o zhes pa ste / 'dir gza' thams cad kyi rkang pa dgod pa'o // gza' thams cad kyi rkang pa rnams ni dbyu gu'i bdag nyid kho na'o // 'dir bcu bzhis bgos pa'i lhag mas mtshon pa ni rgyu ba'i rkang pa'o // de'i steng mar rgyu zhing yod pa ste der gza' zhugs pa'o // des ril po'i cha shas bsgyur la brgya nyi shu rtsa drug gis bgos pas thob pa dang / lhag ma drug cu la sogs pas bsgyur nas bgos pas thob pa'i chu srang la sogs pa mdun gyi phyed la ni longs spyod pa'i rkang pa dang / rgyab ma'i phyed du de dor nas longs spyod pa'i rkang pa nyid gza'i dbyu gu'i gnas su sbyin pa'am dbri par bya'o //

de nas gza'i gnas su gcig la sogs pas nyi ma la sogs pa'i gza' rtogs par bya'o // tshes su ni dbyu gu la sogs pa rnams nyi ma shar ba nas brtsams nas longs spyod par bya ba yin no // nyin zhag so so la nyi mas skar ma la longs spyod pa'i don du dkar po la sogs par smos pa'i tshes gnas gnyis su byas te / gcig la dbyu gu bzhis bsgyur cing / gzhan la yang byed pa'i rim pas nyi shu'am nyi shu rtsa gnyis kyi chu srang gis sam / grub pa'i mtha'i rim pas ni chu srang nyi shu rtsa drug gis bsgyur la / drug cus bgos te thob pa ni steng du gzhug go // steng gi dbyu gu yang drug cus bgos pas thob pa ni rgyu skar du dang / bgos pa'i lhag ma skar ma'i dbyu gur gzhug par bya'o // chu srang yang rgyu skar gyi dbyu gu'i 'og tu dbri par bya'o //

rgyu skar dang de'i dbyu gu'i phung po dang chu srang rnams gnas gnyis su byas te / gcig la ra bi ka'i don du rkang pa gsum dang bcas pa'i rgyu skar drug sbyang bar bya'o //

lug dang dbyug pa la sogs pa sbyang ba las gzhan de ma thag pa skyes pa'i khyim du 'gyur ro //

lug zung karka ṭa ni zla ba pa bsangs dang nyi ma seng ge bu mo srang rnams ni // mig dmar phur bu sgra gcan sdig pa gzhu yi thog ma tha mar gza' lhag spen pa mjug rings rnams // zhes kyang gsungs so //

thog ma tha mar zhes pa la gzhu'i thog ma'i cha ni spen pa'o // tha ma ni mjug rings kyi'o zhes bya'o // 'dir gal te bu lon gyi phung po lhag la // longs spyod kyi phung po nyung ba na // de la rgyu skar gyi 'khor lo nyi shu rtsa bdun rgyu skar gyi gnas su bcug ste sbyang bar bya'o // gal te sbyangs pa'i lhag ma 'khor lo phyed byung na / de'i tshe 'khor lo phyed pa de dor bar bya ste de nyid rim pa min par shes par bya'o // 'khor lo phyed ma dor na ni rim pa kho na'o // rgyu skar la drug cus bsgyur nas / 'og gi dbyu gu dang ldan pa la 'byung ba me zla bas bgos pas thob pa ni khyim rgyu ba shes par byed pa ste / khyim rgyu ba shes nas dbyi bar bya'o // ro dang zung dang zla ba rnams dal ba'i las la khyim drug gi rkang pa ste / karka ṭa la sogs pa skyes ba la sogs pa'i khyim drug tu 'gyur ro // rkang pa 'di lta bu ni gza' thams cad kyi bul ba'i las la'o // 'byung ba la sogs pas ma thob na yang rgyu ba'i rkang pa dang po la gza' gnas so zhes kun la shes par bya'o // de'i tshe des bgos pa'i lhag ma'i dbyu gu rnams bsgyur la zhes pa la sogs pa 'chad par 'gyur pa ltar bya'o // de la gza' thams cad kyi bul ba'i las la rim pas ni bu lon la rim pa min pas nor du shes par bya'o //

de nas longs spyod pa'i rkang pa las gnyis pa longs spyod par bya bas longs spyod do // des bgos pa'i lhag ma'i dbyu gu rnams bsgyur la 'byung ba la sogs pas bgos pa thob pa longs spyod kyi cha dang lhan cig tu sngon ma phyed la / khyim gyi dbang las gza'i longs spyod pa'i rkang pa rnams bsdoms pa dang / phyi ma phyed la bgos pas thob pa'i longs spyod kyi cha dor nas long spyod kyi cha gzhan dang lhan cig longs ma spyad pa'i rgyu ba'i rkang pa bsdoms pa rnams / nor dang bu lon gyi dbang las gza'i longs spyod kyi dbyu gu la bsnan pa'am dbri'o // 'di nyid ni nyi ma'i dag pa'i ra bi ka'o // nyi ma'i skar ma'i gnas su skar ma la sogs pa rnams ni longs spyod pa'o // lhag ma ni longs spyod bya'o // 'chad par 'gyur pa'i zla ba la yang de ltar sbyor ba yang ngo //

da ni nyi ma'i ma dag pa'i ra bi ka brjod par bya ste /

nyi mar dus dang ro dang klu dang bcu dang 'phrog byed 'phrog byed drag po phyogs dang klu dang drug //
me dang nam mkha' byang dang lho ru bgrod pa'i mthar gyur pa na nor dang bu lon dag bya'o //
zla ba drug la phyogs kyi dbye bas nyin mor byed pa rgyu ba zla ba 'pho ba'i dbye bas so //

zhes pas / 'dir karka ṭa la sogs pa nas dbri ste phyogs dang po la dus so // karka ṭa'i phyogs gnyis pa la ro'o // de bzhin du gzhu la me dang nam mkha' bgrod pa'i mthar ro // de ltar chu srin la sogs pa la sbyin no zhes bya'o //

[7] zla bas rgyu skar la longs spyod pa'i don du nyi ma'i longs spyod kyi rgyu skar gyi gnas su dkar po la sogs par smos pa'i tshes rnams sbyin no // de'i rjes la tshes de dag gnas gzhan du ro yis bsgyur la / gza'i longs spyod kyi dbyu gu la sogs pas bsres te / nyi ma'i longs spyod kyi dbyu gu'i gnas su bu lon zhes bya ba ste phri ba 'di las zla ba'i longs spyod du 'gyur ro // nyi ma'i longs spyod dang zla ba'i longs spyod bsres pas sbyor bar 'gyur ro //

dkar po la sogs par smos pa'i tshes rnams gnyis kyis bsgyur la gcig dor te srid ni bdun gyis bgos pa'i lhag ma byed par gyur to // byed pa'i longs spyod ni tshes kyi longs spyod nyid do // 'dir thun mong gi tshul ni / dbugs kyi gnas su drug las lhag pa'i dbugs mi gnas so // dus kyis bgos pas thob pa ni chu srang du gzhug go // de yang drug cu las lhag pa mi gnas so // drug cus bgos pas thob pa ni dbyu gur gzhug go // dbyu gu yang de bzhin du gza' 'am skar mar gzhug go // gza' yang bdun du gyur pa na rnam par 'jig go // skar ma yang nyi shu rtsa bdun du gyur pa na mi gnas so // sbyor ba yang de bzhin no // de ltar rgyu skar dang / gza' dang / sbyor ba dang / nyin zhag gcig la dbyu gu drug cu'o //

[8] de la gza' ni nyi ma la sogs pa bdun no // tshes ni gcig la sogs pa bco lnga'o //

skar ma ni tha skar dang / bra nye dang / smin drug dang / snar ma dang / mgo dang / lag dang / nab so dang / rgyal dang / skag dang / mchu dang / gre dang / dbo dang / me bzhi dang / nag pa dang / sa ri dang / sa ga dang / lha mtshams dang / snron dang / snrubs dang / chu stod dang / chu smad dang / gro bzhin dang / mon dre dang / mon gru dang / khrums stod dang / khrums smad dang / nam gru zhes bya ba ste nyi shu rtsa bdun no //

de bzhin du sbyor ba ni rnam par sel ba dang / mdza' ba dang / tshe dang ldan pa dang / skal pa bzang po dang / mdzes pa dang / shin tu skrang ba dang / las bzang dang / 'dzin pa dang / zug rngu dang / 'bras dang / 'phel ba dang / brtan pa dang / rnam par 'joms pa dang / yid dga' ba dang / rdo rje dang / dngos grub dang / rgud pa dang / chu sbyin dang / yongs su snun pa dang / zhi ba dang / grub pa dang / bsgrub bya dang / dge ba dang / dkar po dang / tshangs pa dang / dbang po dang / rnam par 'dzin pa zhes bya ba ste nyi shu rtsa bdun no //

byed pa rnams ni ba baṃ dang / bā la baṃ dang / kau la baṃ dang / tai ti laṃ dang / ga ra dzaṃ dang / pa ṇi dzaṃ dang / biṣṭi zhes bya ba ste bdun no // de bzhin du sha ku ni dang / tsa tuṣpa do dang / nā ga dang / kiṃ stu ghna zhes bya ba dang bcu gcig go // de la dkar po'i tshes gcig gi phyi ma phyed nas brtsams nas / re re zhing thun bzhi la longs spyod cing grangs kyi go rims ji lta ba bzhin du yang dang yang du 'khor bas nag po'i bcu bzhi'i sngon ma phyed kyi bar du bdun po rnams longs spyod do // de'i phyi ma phyed nas brtsams nas dkar po'i tshes gcig gi sngon ma phyed kyi bar ni gzhan bzhi po rnams kyi'o // tshes kyi longs spyod la mnyam par cha gnyis su byas te / snga ma phyed dang / phyi ma phyed du rnam par gzhag par shes par bya'o //

gza' dang / tshes dang / skar ma dang / sbyor ba dang / byed pa ste yan lag lnga'i rim pa'o //

[9] dbyu gu dang / bra nye dang / smin drug gi rkang pa gcig gis lug go // de bzhin du so sor rkang pa dgu yis bcu gnyis po rnams te / lug dang / khyu mchog dang / 'khrig pa dang / karka ṭa dang / seng ge dang / bu mo dang / srang dang / sdig pa dang / gzhu dang / chu srin dang / bum pa dang / nya'i khyim rnams sa ga la sogs par shes par bya'o //

mig dmar pa sangs gza' lhag zla ba nyi ma dang //
gza' lhag pa ba sangs dang mig dmar phur bu dang //
spen pa spen pa phur bu rnams ni rim pa yis //
khyim 'di rnams su zhing can du ni yang dag 'dod //

kla klo dbang po'i lo dag pa'i lo la brgyad bsres pa bzhi brgyas bsgyur ba la sngar dag pa'i lo la brgyad bsres pas phri ba la / bcu bdun lhag pa'i sum brgyas bgos pas thob par gnyis bsres ba ni gzar 'gyur ro // bgos pa'i lhag ma drug cus bsgyur te / dbyu gur byas pa bcu bdun la sogs pas bgos pas thob pa bzung la / bgos pas thob pa'i lhag ma dbyi bar bya'o // thob pa'i dbyu gu la sum cu bsres la drug cus bgos pas thob pa gnyis bsres ba'i gzar gzhug go // bgos pa'i lhag ma gza'i dbyu gu'i bstan pa ste 'og tu'o //

gza' la yang bdun gyis bgos pa'i lhag ma lo ma 'phos kyi bar steng du gza'i dhru ba kar 'gyur ro // 'dir gang gi tshe nyi ma nya spangs nas lug tu 'gro ba de'i tshe gzhug pa'i gzhug bya bcu gnyis lug la sogs par rim pa bzhin /

zla ba ri dang 'byung ba rig byed yon tan mda' dang ri bong can ri zla ba gsum pa la'o //
rig byed me dang 'byung ba zla ba mig dang lag pa zung dang rig byed mig ni drug pa la'o //
drug dang zla ba mda' dang zla ba ri zung me drug zla ba rig byed ri dang 'jig rten no //
drug dang rig byed stong dang stong pa mig dang mda' yi rkang pa rnams ni nya yi khyim du nyi ma'o //

zhes pa 'di rnams kyi dgod pa ni / re'u mig bcu gnyis po 'di rnams te / so sor thog mar gza'i nges par sbyin no // gnyis pa lnga bcu rtsa bdun la sogs pa dbyu gu'i brtan par 'gyur ro zhes pa byed pa'i 'pho ba ste / gza' dang de'i longs spyod du shes par bya'o //

[10] da ni mig dmar la sogs pa rgyu skar la longs spyod pa'i don du nyin zhag gi grangs brjod de / dag pa'i zla ba rnams nyin zhag gi phung po'i don du sum cus bsgyur la / dkar po la sogs par smos pa'i tshes dang bcas pa gnas gsum du byas la / 'og gi phung po ri dang nam mkha' ri yis bgos pas thob pa dbus mar sbyin no // de nas dbus ma drug cu rtsa bzhis bgos pas thob pas phri ba'i steng ma'i phung po mi gsal ba'i nyin zhag gi tshogs yin no // de gnas gnyis bzhag la / gcig la gza' bdun gyis bgos pas / gal te de nyin zhag gi gzar ma gyur na / de nas gcig la sogs pa ji ltar gzar 'gyur ba'i thog ma'i phung por sbyin pa'am dbri bas de nas gsal ba'i nyi ma'i tshogs su 'gyur ro //

[11] mig dmar dag par bya ba'i don du / gsal ba'i nyin zhag gi tshogs la bdun dang drug cus lhag pa'i brgya bsres nas / mig dmar gyi nyin zhag gi 'khor lo ri dang klu dang dus kyis bgos pas thob pa ni khyim bskor ba ste phyi mar bya'o // 'di ltar gzhan rnams la yang ngo // lhag ma rgyu skar gyis bsgyur la // rang gi nyin zhag gis 'khor los bgos pas thob pa ni skar mar 'gyur te steng du'o // de'i lhag ma drug cus bsgyur la rang gi nyin zhag gi 'khor los bgos pas thob pa ni dbyu gu ste 'og tu'o // sngar bzhin du chu srang la sogs pa'o // skar ma la sogs pa 'di dag gnas gnyis su bzhag la / gcig la skar ma phyed dang bcas pa'i dgu sbyang bar bya'o //

de nas nyin par lug dang dbyug pa zhes bya ba la sogs pa gsungs pa rnams shes par bya'o // bye brag tu 'dir de kho na nyid dang / bco brgyad dang ri rnams bul ba'i las kyi rkang pa'o //

skar ma la sogs pa gzhan la sbyin pa'am 'bri ba'o / zhes pa / mig dmar gyis bul ba'i las dag pa'o //

myur ba'i las la yang mig dmar dang / phur bu dang / spen pa rnams bul ba'i las yongs su dag pa'i longs spyod gnas gnyis su byas te / gcig gis nyin byed ma byas pa'i nyi ma'i longs spyod tshes bsres pa dag par ma byas te rkang pa gsum dang bcas pa'i skar ma drug dor ba la sogs pa'i cho ga ma byas pa la sbyang bar bya'o // de nas nye bar brjod pa'i gal te bu lon zhes pa la sogs pa nas rim pa kho na'o zhes pa'i bar du shes par bya'o // 'dir myur ba'i bya pa la rim pas ni nor te bsnan cing / rim pa min pas ni bu lon te dbri bar bya'o // sbyangs shing ji tsam yod pa dor ba'i lhag mas gza'i rkang pa rtogs par byed pa ste rkang pa rnyed pa shes nas phyi bar bya'o // rkang pa de nyid kyis dbyu gu lhag mas bsgyur la / drug cus bgos pas thob pa dang / rkang pa de'i cha dang lhan cig sngon ma phyed du khyim rgyu ba'i dbang gis gza' yis longs spyod pa'i dbang gis rkang pa rnams bsdams pa dang phyi ma phyed du ni bgos pas thob pa dang / rkang pa de'i cha dor te rkang pa gzhan ma de'i cha dang lhan cig longs ma spyad pa rnams / gzhan bul ba'i las kyis dag pa'i gza'i longs spyod la bsnan pa'am dbri bar bya'o //

'dir rkang pa ni bcu bzhi ste / rgyal ba me mig rnam gsum zla ba lag pa gnyis // bco brgyad tshes dang drag po me dang rtsa ba nas // bcu gcig brgyad dang me'o nam mkha' klu dang ni // de rjes lnga bcu gsum po 'di rnams mig dmar gyi'o // rtsa ba zhes pa ni / dbus nas thad kar re ka'o // phyogs phyogs bug pa nor drug drug // gnyis gcig rtsa ba yon tan ro // bug pa drag po rgyal po ri // phur bu'i myur las rkang pa yin //

dus mda' mda' dang rig byed rig byed mig dang mig dang nam mkha' dang / rtsa ba nas gnyis zung zla ro brgyad gsum ni spen pa'i rkang pa'o // tshigs su bcad pa phyed pa'o //

de bzhin du bul ba'i nyi ma gnas gnyis su gzhag pa gcig gis gza' lhag gi rgyu ba'am / pa ba sangs kyi rgyu ba la sbyang bar bya'o // de nas sbyangs te zhes pa la sogs pa nas / longs ma spyad pa rnams shes pa'i mthar thug la / de ma thag tu mig dmar du gsungs pa rnams byas la / gzhan bul ba'i nyi mar bsnan pa'am dbri bar bya'o // de ltar de nyid gza' lhag gi longs spyod dang / pa ba sangs kyi longs spyod du 'gyur ro //

rgyal po rgyal po de nas tshes //
mi dang yan lag zhi ba ri //
lnga mkha' rtsa ba nas ni mtsho //
dbang phyug nyi shu nyi shu brgyad //
sum cu rtsa bzhi gza' lhag gi //
gsum du de nyid gnyis rgyal ba //
gnyis su gnyis mig skyon tshes brgyad //
rtsa ba nas drug mkha' me dang //
bug pa bug pa yon tan ri //
pa sangs myur rgyu'i rkang pa'o //

zhes pa ni sa'i bu la sogs pa'i myur ba'i las dag pa'o // bul ba'i las la gza' lhag dag pa'i don du gsal ba'i nyi ma'i tshogs rnams brgya yis bsgyur nas / me dang nyi ma ri yis phri ba las gza' lhag gi nyi ma'i 'khor lo ri dang bug pa ri dang klu yis bgos pas thob pa zhes bya ba la sogs pa nas / chu srang la sogs pa'o / zhes pa'i bar du mig dmar bzhin du bya'o // rgyu skar la sogs pa 'di dag ni myur ba'i las kyi don du rgyu ba zhes brjod do // de'i phyir de'i don du gnas gzhan du bzhag go // nyi byed ma byas pa'i nyi ma'i longs spyod gnas gnyis su byas te nyi ma'i longs spyod gcig la rgyu skar phyed dang bcas pa'i bcu drug sbyang bar bya'o //

de nas nyi mar brjod pa'i lug ces pa la sogs pa nas nor dang bu lon gyi dbang las shes pa'i mthar thug pa byas te / nyi ma'i longs spyod gzhan la bsnan pa'am dbri bar bya'o zhes pa ni gza' lhag gi bul ba'i las dag pa'o // 'di ni gzhan du nyi ma'i longs spyod bul ba'i las dag pa gza' lhag gi bdag nyid du gyur pa ste / myur ba'i las kyi don du ni bul ba'i nyi ma zhes brjod do // bcu dang ri dang rtse mo can ni bul ba'i las kyi rkang pa'o //

phur bu dag pa'i don du gsal ba'i nyi ma'i tshogs la / mkha' dang nam mkha' dang ro dang mig gis phri ba la phur bu'i nyi ma'i 'khor lo so dang me dang rgya mtshos bgos pas thob pa zhes pa la sogs pa sa'i bu bzhin bya'o // 'dir khyad par ni 'di yin te / rgyu skar bcu gnyis sbyang ba dang / 'phrog byed dang / dgu dang rtse mo can ni rkang pa'o //

pa ba sangs dag pa'i don du gsal ba'i nyi ma'i tshogs la bcu yis bsgyur nas brgyad cu rtsa bzhis phri ba la / pa ba sangs kyi nyin zhag gi 'khor lo ri dang rgyal ba mig gis bgos pas thob pa zhes pa la sogs pa thams cad gza' lhag bzhin du bya'o // khyad par ni 'di yin te / rgyu skar drug sbyang ba dang / rkang pa ni mda' dang / zung dang ri bong can no //

spen pa dag pa'i don du gsal ba'i nyi ma'i tshogs la mkha' dang mig dang brgyad dang rig byed kyis phri ba la / nyi ma'i bu'i nyi ma'i 'khor lo drug dang ro dang ri dang nam mkha' dang gcig gis bgos pas thob pa zhes bya ba la sogs pa mig dmar bzhin du bya'o // khyad par ni rgyu skar bco brgyad sbyang ba dang / nyi shu rtsa gnyis dang tshes dang dus kyi rkang pa rnams zhes bya ba ni gza' lhag la sogs pa'i bul ba'i las yongs su dag pa'o //

'on kyang bul ba'i las dag pa'i gza'i longs spyod myur ba'i las kyis yongs su dag pas na / las gnyis kyis gza' gcig nyid kyis longs spyod dag par 'gyur gyi bul ba'i las dag pa gza'i longs spyod tha dad pa dang myur pa'i las yongs su dag pa tha dad pa yang ma yin no / zhes skar ma'i bstan bcos rig pa rnams kyi'o // las gnyis kyis longs spyod yongs su dag pa ni / mig dmar dang / gza' lhag dang / bla ma dang / pa ba sangs dang / spen pa rnams kho na'o // nyi ma ni bul ba'i las kho nas so // zla ba ni myur pa'i las kho nas so zhes so //

[12] sgra gcan gyis rgyu skar la longs spyod pa'i don du / dag pa'i zla bar mig dang nyi ma bsres la zla ba phyed pa'i phung po'i don du gnyis kyis bsgyur bar / nya la zla ba 'dzin pa'i don du zla ba phyed pa gcig bsre zhing / gnam stong la nyi ma 'dzin pa'i don du zla ba phyed pa gnyis bsres pa la / sgra gcan gyi zla ba phyed pa'i 'khor lo nam mkha' dus dang rgya mtsho yis bgos pas thob pa phyi bar bya'o // bgos pa'i lhag ma zla ba phyed pa rnams rgyu skar gyi don du nyi shu rtsa bdun gyis bsgyur ba la nam mkha' la sogs pas thob pa rgyu skar du 'gyur ro // lhag ma drug cus bsgyur ba la nam mkha' la sogs pas bgos pas thob pa ni dbyu gu'o // de'i lhag ma la yang de bzhin du chu srang ngo // de'i lhag ma drug gis bsgyur cing nam mkha' la sogs pas thob pa dbyu gu'o // rgyu skar la sogs pa 'di rnams kyis rgyu skar nyi shu rtsa bdun la phri ba ni sgra gcan gyi kha'i longs spyod du 'gyur ro // kha'i longs spyod de nyid du rgyu skar phyed dang bcas pa'i bcu gsum bsres pa ni mjug ma'i longs spyod do //

de nas zla ba so sor nyi ma'i longs spyod la rgyu skar gnyis dang dbyu gu bcu gcig ste / zla ba drug la rgyu skar bcu gnyis dang dbyu gu drug cu rta drug tu 'gyur zhing / de las bcu gsum phri bas lnga bcu rtsa gsum du 'gyur ro // 'di nyi ma'i longs spyod la / nyi ma 'dzin pa na gnam stong gi longs spyod la ra bi ka bsnan pa'am phri ba la'o //

de nas sgra gcan gyi longs spyod la dbyu gu bzhi bcu zhe lnga phri la lhag ma skar ma'i longs spyod kyis sbyang bar bya'o // de la gal te kha'am mjug ma dang skar ma mnyam par gyur na / de'i tshe kho na gzas 'dzin gyis gzhan du ni ma yin no // yang na sngar smras pa'i tshul gyis bsgrub pa'i gnam stong gi nyi ma'i longs spyod kyis sgra gcan gyi kha'i longs spyod dam mjug ma'i longs spyod la sbyang par bya'o //

zla ba 'dzin pa ni zla ba nya'i longs spyod kyis sgra gcan gyi kha'i longs spyod la sbyang bar bya'o // kha'am mjug ma dang lhan cig rgyu skar mnyam pa nyid la 'dzin gyi gzhan du ni ma yin no // 'dir yang gnam stong gi mtha' 'am nya'i mthar dus tshigs kyi mtshams su sgra gcan gyi dkyil 'khor la nyi zla'i dkyil 'khor 'jug go // dkyil 'khor gyi sgra ni 'dir dbyu gu drug cu ste / rgyu skar gcig gi longs spyod do // de yang khyim bcu gnyis dang cha bcu drug gi bdag nyid du rig par bya'o // de la gal te sgra gcan gyi longs spyod la 'di gnyis kyi longs spyod dag na / de'i tshe dbyu gu drug cu'i mthar thug pa thams cad 'dzin to // longs spyod phyed dag par gyur na phyed 'dzin to // cha ni dbyu gu bzhi'i bdag nyid de sgra gcan gyi longs spyod la zhugs na bzhi cha'i bar du gza' dang lhan cig 'gro bar shes par bya'o // gang gi tshe yang sgra gcan gyi kha'i longs spyod du 'dzin pa de'i tshe shar gyi cha nas so // mjug ma'i longs spyod du ni nub kyi cha nas so // de bzhin du phyogs dang phyogs mtshams kyi cha'i khor yug gzhan ni gzhan du shes par bya'o // zhes ṭī ka las so //

'dzin pa 'di dag kyang zla ba drug nyid na yin no // don dam par ni zla ba nyid mun pa'i rang bzhin gyi sgra gcan gyis 'dzin te / bsil ba'i 'od zer gyi phyir ro // nyi ma ni min no // gnam stong gi mtha'i dus su ni zla ba yang nyi ma la zhugs pa'i phyir ni nyi ma gzung ngo zhes bya ba ni tha snyad do // zhes pa sgra gcan dag pa'o //

[13] mjug rings ni nyi ma'i dkyil 'khor la zhugs nas nyi ma so so la dbyu gu bzhi dang / chu srang nyi shu rtsa drug ni nyi ma'i longs spyod de / de las lhag par chu srang phyed dang gsum ni myur bar rgyu ba na / rim pas mdun nas dang / yon por rgyu ba na rim pa min pas rgyab nas rnam par rgyu'o // de ltar lo gsum gnas nas phyir 'thon no // 'thon nas kyang nyi ma so so la dbyu gu gnyis 'char te / dbyu gu yang rkang pa dang bcas pa'i chu srang lnga bcu rtsa drug gis bdag nyid de / a ba dhū tī las 'thon pa'i phyir mjug rings kyi'o // zla ba gcig gi bar du / du ba med par skar ma bzhin du snang la / de nas zla ba phyed du / du ba'i mjug ma ring por gsal lo // de bzhin du zla ba phyed dang gnyis kyis mthar slar yang nyi ma'i dkyil 'khor la de bzhin du lo gsum gyi bar du mi snang bar 'gyur ro // 'di'i thog mar 'char ba ji ltar grags pa brtags pas shes par bya'o // de ltar 'char ba gcig gi shes na dus dpag tu med pa'i shes par 'gyur ro // mjug rings dag pa'o //

[14] 'dir thun mong gi rim pa 'di dag ste / myur ba'i las la nyi ma'i dkyil 'khor las 'char ba'i gza' rim par bgrod pa na / dbyu gu'i rkang pa bcu bzhi'i phyed las / sngon ma phyed la longs spyod pa na myur bar rgyu ba zhes brjod do // phyi ma phyed la longs spyod pa na bul bar rgyu ba'o // de las 'khor lo phyed dor nas gza'i rim pa ma yin pa ste / sngon ma phyed pa ni yon por rgyu ba'o // phyi ma phyed la 'thon por rgyu ba zhes brjod do // khyim gyi rgyu skar gyi 'khor lo 'dor ba'i phyir ro // 'dir rim pa la sngon ma phyed du ni nor 'phel la / gza' rnams kyang shar du mngon par phyogs pa'o // phyi ma phyed du ni nor 'dzad pa dang lhor mngon par phyogs pa'o // rim pa min pa la sngon ma phyed du bu lon 'phel la kha nub tu mngon par phyogs pa'o // phyi ma phyed du bu lon nyams pa dang byang du mngon par phyogs pa'o // 'di dag 'chi ltas la sogs pa'i dbang gis phyogs gzhan du lta ba nyid do // rang bzhin gyis ni sgra gcan kha nub tu phyogs nas ri rab la g.yas skor byed la / gza' gzhan ni shar du kha lta'o // de la nyi ma'i 'od zer gyis bsgribs pa'i phyir nyi ma la nub pa ste / gza' thams cad du med pa ni ma yin no // slar yang de bzhin kho nar 'char ro zhes bya'o //

[15] 'dir 'phags pa'i yul du nyi ma dang zla ba'i longs spyod 'phel 'grib kyi dbang gis dbyu gu drug cu'i rang bzhin gyi nyin mtshan las bcu yis bgos pas thob pa'i dbyu gu rnams kyis nyin mo 'phel bar 'gyur ba ni mtshan mo 'grib ste / lho me'i khor yug gi mtshams nas gangs can chen po'i khor yug gi mtshams kyi bar du dpag tshad stong phrag bdun cu rtsa lnga byang du bgrod pa la zla ba drug gis so // de bzhin du gangs can chen po'i khor yug gi mtshams nas / lho me'i khor yug gi mtshams kyi bar du lhor bgrod pa na mtshan mo 'phel zhing nyin mo 'grib pa'o // de ltar gyur pa na nyin mtshan so so la chu srang gnyis 'phel ba'am 'grib par shes par bya'o // de bzhin du bod yul dang / li yul dang / rgya nag la sogs pa'i yul rnams dang / shambha la'i yul gyi mtha'i bar du dgu dang / brgyad dang / bdun gyis bgos pas thob pa'i dbyu gu rnams kyis dang / ke la sha'i dum bur drug gis bskal pas nyin mtshan la ji ltar rigs par ro // ke la sha'i dum bu las byang phyogs su gangs can gyi ri'i bar la nyin mtshan so so la dbugs bzhis lhag pa'i chu srang gsum 'phel ba'am 'grib pa'o //

[16] gangs ri'i phyi rol gyi phyogs mtshams brgyad du khor yug gi rnam pas rgyu skar gyi khyim zlum po gcig tu'o // 'di'i dbus na mnyam pa'i re khā'o // de nyid kyi phyogs logs gnyis su gzhu'i rnam pa'o // 'dir yang 'bru bsnyil ba'i dbus kyi ka ba bzhin dang // glang bzhin 'khor la / rgyu skar dbyug pa la sogs pa nas nag pa'i phyed kyi bar du byang phyogs kyi re khā la / lho phyogs su yang nag pa'i phyed la sogs pa nas nam gru'i mthar ro // de rnams kho na la rkang pa dang bcas pa'i rgyu skar gnyis la khyim gcig nyid do // de ltar khyim bcu gnyis po rnam par gzhag go // de la brten pa'i gza' ni longs spyod pa'o //

byang phyogs su bgrod pa na zlum po 'di'i byang gi mtha' ni / byang gi me'i khor yug gi dang por 'gro'o // lho phyogs kyi mtha' yang gangs can gyi ri'i lho'i mthar reg pa'o // lhor bgrod pa na yang lho phyogs kyi mtha' ni lho'i me'i khor yug gi dang por 'gro'o // byang phyogs kyi mtha' yang bsil ba'i ri'i byang gi mtha' reg par 'gyur ro // rgyu skar la sogs pa 'di dag kyang ri rab la skor ba byed pas 'gro ba'i 'khor ba'i dbang gis zlum po'i rnam par 'gyur ro // zlum po'i tshad ni lho me'i khor yug nas gangs can chen po'i bar ro // dpag tshad stong phrag bdun cu rtsa lngas so // de dag la 'khor lo'i nyin zhag brgya brgyad cu rtsa phyed dang gsum gyis bgos pas thob pa ni phyogs kyi cha nyi mas 'dor ba'o // de ltar dum bu bcu gnyis su nyi ma'i thad kar 'pho bar rig par bya'o // byed pa'i lam mo //

[17] 'on kyang de ltar byed pa'i lam gyis nyi ma dus rtag tu dag pa ma yin la /

nyi ma'i longs spyod ma dag 'dis //
mig dmar la sogs dag byas la //
'dir ni nges par dag mi 'gyur //
rtsa ba nyams pa'i ljon shing bzhin //

de bas na grub pa'i mtha'i lam brjod par bya ste / de'i rim pa 'di dag go / sa gzhi mnyam po la khru gang gi tshad kyi maṇḍala gyi dbus su btsugs pa'i mtho gang gi tshad kyi shing gi grib ma / snga dro re khā'i phyi rol nas rim gyis bskum pa na / gang gi tshe maṇḍala gyi mtha'i re khā'i dbus su zhugs pa de'i tshe / gnas der bya rog gi rjes kyis mtshan ma byas te / de nyid nub kyi phyogs so // phyi dro ni maṇḍala gyi dbus nas rim gyis brkyang ba na / gang gi tshe zhes pa la sogs pa sngar bzhin du mtshan ma byas te / de nyid shar gyi phyogs so // 'dir mtshan ma gcig gi steng du skud ba bzung ste / mtshan ma gzhan gyi mdun du maṇḍala thod lo kor gyis bya zhing / mtshan ma gzhan gyi steng du yang / skud pa bzung nas de bzhin du byas pas ji ltar nya'i rnam par 'gyur ro // maṇḍala gnyis po 'di dag gi dbus kyi nya'i rnam pa'i kha'i dbus ni lho phyogs so // mjug ma'i dbus ni byang phyogs so //

de ltar phyogs gtan la phab nas maṇḍala gnyis po dbyi bar bya'o // byang du bgrod pa'i nyin mo las gong du / nyi ma bcu pa nas brtsams nas / nyi ma'i gung la brtag par bya'o // de la thog ma maṇḍala gyi byang phyogs kyi mtha'i re khā'i dbus nas maṇḍala gyi nang du nyin mo gang la 'jug pa de nyi ma byang du bgrod pa'i 'pho ba'i nyin mo'i / de'i gza' dang / de'i tshes dang / de'i sbyor ba dang / de'i byed pas so // de'i nyin mo nyi ma'i longs spyod la sa ga la sogs pa'i zla ba dgu'i lug la sogs pa'i khyim dgu la / rgyu skar gyi gnas su nyi shu dang / dbyu gu'i gnas su bco lnga'o zhes bya ba ni rtsa ba'i dhru ba ka'o // dhru ba ka de la nyin re zhing dbyu gu bzhi dang / chu srang nyi shu rtsa drug bcug la / nyi ma'i rkang pa rnams dag par bya ste / sngar brjod pa'i rkang pa gsum dang bcas pa'i rgyu skar drug sbyang bar bya'o // zhes pa la sogs pa'i tshogs so // de skad du yang rtsa ba'i rgyud du /

bgrod thog nas brtsams nyin re zhing //
slar yang bgrod 'gyur bar du sbyin //
gsungs pa'i las kyi cho ga yis //
nyi ma'i rkang pa dag par bya //

zhes gsungs so /

[18] gza' dang / tshes dang / rgyu skar dang / sbyor ba dang / byed pa dang / khyim dang / zhing can dang / 'pho ba dang / gza' 'di rnams kyi 'bras bu ni gzhan du go sla bas 'dir ma dgrol lo //

gza' skar rgya chen 'di dag bshad cing de rnams 'bras bu ni / dus kyi 'khor lo'i rgyud la 'jug pa 'dir ni ma bshad de /

tshig gi 'brel pa gegs med blo bzang rnams kyis bde blag tu // rtogs phyir 'di la dam pa rnams kyis bzod mdzad rigs // 'jigs med kyis brtsams 'di yi snying gi ni // rab tu rnam par 'byed pa'i gnas rgyas shing // legs byas shar ba 'di las 'gro gsum la // rgyal ba'i phun sum tshogs pa'i 'bras bur shog //

dpal dus kyi 'khor lo la 'jug pa zhes bya ba / slob dpon mkhas pa chen po 'jigs med 'byung gnas sbas pas mdzad pa rdzogs so // // paṇḍi ta chen po de nyid dang / bod kyi lo tsā ba śrī dharmmā kī rtis bsgyur ba'o // slad kyis yul ma ga dhā'i paṇḍi ta chen po mkhas btsun grub pa brnyes pa rā hu la śrī bha dra'i zhal snga nas / chag lo tsā ba śākya'i dge slong dpal gyi mtha' can gyis dag par bcos shing gtan la phab pa'o //


    E. Henning.
    Last updated 30 June 2013.
    Return to calendar introduction.